गोंय अस्मिताय दीस

अस्मिताय जपात गोंयकारपण जागयात, कारण तुमचें अस्तित्व तुमच्याच हातांत.

गोंय अस्मिताय दीस

निर्मला शिक्षण संस्थेच्या कोंकणी अध्यापनशास्त्र विभागाच्या दुसऱ्या वर्साच्या विद्यार्थ्यांनी 'अस्मिताय दीस' मनयलो. अस्मिताय दिसाची सुरवात चिंतनशील, प्रेरक अशा प्रार्थना सभेंतल्यान केली. प्रार्थना सभे उपरांत ग्रेशल  मास्करेन्हस हे विद्यार्थिनीन 'हांव गोंय उलयतां' ह्या आप-उलोवपांतल्यान गोंय स्वता कितें भोगता, हे संबंदीत तरेकवार मुद्दे मांडले. गोंयच्या इतिहासांतल्या ह्या म्हत्वाच्या दिसाची याद करून दिवप, विद्यार्थ्यां मदीं जागृताय हाडप, आवयभाशे विशीं मोग निर्माण करप, आयजकालची गोंयची स्थिती, पर्यावरणाचे प्रस्न आनी बदलत वचपी लोकजीण हाचेर उजवाड घालप हो ह्या आप-उलोवपाचो मुखेल हेतू आशिल्लो. ह्या अस्मिताय दिसाक अनुसरून विद्यार्थ्यांनी एक आकर्शक तकटो तयार केलो, जंय अस्मिताय दिसाचें म्हत्व चित्रायल्लें. गोंयच्या दायजाची आनी संस्कृतायेची वळख करून दिवपी एका खाशेल्या प्रदर्शनाचें आयोजन केल्लें. ह्या प्रदर्शनांत गोंयच्यो परंपरागत वस्तू, खाणां - जेवणां आनी अस्मिताये संबंदीत कांय चित्रां मांडिल्लीं. ह्या उपक्रमांत विद्यार्थ्यांनी गोंयची संस्कृती, गोंयचें दायज, कोंकणी भास तिगोवन दवरपाची कित्याक गरज आसा, हाचेर उजवाड घालो. हो उपक्रम निर्मला शिक्षण संस्थेच्या पयल्या आनी दुसऱ्या वर्साच्या विद्यार्थ्यां खातीर राबयलो. 

प्रस्तुतीकरण :- कोंकणी विभाग शिक्षक प्रशिक्षणार्थी (S.Y.B.Ed.2025 - 2026) 
मार्गदर्शक :-  सौ. सुवर्णा गांवस (सहयोगी प्राध्यापक)